សារ​​ប្រធាន គ​.ជ.ស.ព.

សារប្រធាន​លេខាធិការដ្ឋាន គ.ជ.ស.ព.

គណៈកម្មាធិការជាតិកិច្ចសម្រួលពាណិជ្ជកម្ម (គ.ជ.ស.ព.) ត្រូវបានបង្កើតឡើងដោយអនុក្រឹត្យលេខ ១៨ អនក្រ.បក ចុះថ្ងៃទី២៦ ខែកុម្ភៈ ឆ្នាំ២០២០ និងបានរៀបចំកិច្ចប្រជុំលើកទី១ នាថ្ងៃទី១១ ខែតុលា ឆ្នាំ២០២១ តាមប្រព័ន្ធវីដេអូក្នុងគោលបំណងពិនិត្យវឌ្ឍនភាព និងជំរុញប្រសិទ្ធភាពនៃការអនុវត្តកិច្ចព្រមព្រៀងស្តីពីកិច្ចសម្រួលពាណិជ្ជកម្ម របស់អង្គការពាណិជ្ជកម្មពិភពលោក (WTO-TFA) អនុម័តដាក់ឱ្យប្រើប្រាស់ផែនទីចង្អុលផ្លូវស្តីពីកិច្ចសម្រួលពាណិជ្ជកម្ម ឆ្នាំ២០២២-២០២៥ ព្រមទាំងដាក់ទិសដៅការងារបន្ត។ ក្នុងទិសដៅការងារបន្ត លេខាធិការដ្ឋាន គ.ជ.ស.ព. ត្រូវចងក្រង និងបោះពុម្ពផ្សព្វផ្សាយកម្រងបទដ្ឋានគតិយុត្តិនានា ព្រមទាំងឯកសារពាក់ព័ន្ធនឹងកិច្ចព្រមព្រៀងស្តីពីកិច្ចសម្រួលពាណិជ្ជកម្ម ដើម្បីចែកជូនសមាជិក គ.ជ.ស.ព. ក្រសួង-ស្ថាប័ន និងវិស័យឯកជនពាក់ព័ន្ធ។ ឆ្លើយតបចំពោះភារកិច្ចនេះ ក្រុមការងារលេខាធិការដ្ឋាន គ.ជ.ស.ព. បានប្រមូលចងក្រងរៀបចំជាសៀវភៅ “ ផែនទីចង្អុលផ្លូវស្តីពីកិច្ចសម្រួលពាណិជ្ជកម្មឆ្នាំ២០២២-២០២៥” ដោយបានបញ្ចូលនូវឯកសារសំខាន់ៗរួមមាន៖ ផែនទីចង្អុលផ្លូវស្តីពីកិច្ចសម្រួលពាណិជ្ជកម្មសម្រាប់ឆ្នាំ២០២២-២០២៥ ការជូនដំណឹងពីការអនុវត្តកិច្ចព្រមព្រៀង WTO-TFA របស់កម្ពុជា អត្ថបទកិច្ចព្រមព្រៀង WTO-TFA, ច្បាប់ អនុក្រឹត្យ និងសេចក្តីសម្រេចផ្សេងៗពាក់ព័ន្ធ សម្រាប់ជាជំនួយស្មារតីក្នុងការតាមដាន និងសម្របសម្រួលការអនុវត្តកិច្ចព្រមព្រៀង WTO-TFA។ កន្លងមក កម្ពុជាបានជូនដំណឹងពីអនុលោមភាពតាមបញ្ញត្តិនៃកិច្ចព្រមព្រៀង គឺបញ្ញត្តិប្រភេទ A មាន ចំនួន ៨២.៨%, បញ្ញត្តិប្រភេទ B មានចំនួន ១.៧% ជាបញ្ញត្តិដែលអាចអនុវត្តបានដោយខ្លួនឯង ដោយពុំមានតម្រូវការជំនួយពីខាងក្រៅ គ្រាន់តែមានត្រូវការពេលវេលាបន្ថែម, និងបញ្ញត្តិប្រភេទ C មានចំនួន ១៥.៥% ជា បញ្ញត្តិដែលជាកម្មវត្ថុ នៃការផ្តល់ជំនួយបច្ចេកទេស ការកសាងសមត្ថភាពពីសមាជិកជាប្រទេសផ្តល់ជំនួយដោយផ្ទាល់ ឬតាមរយៈដៃគូអភិឌ្ឍន៍ជាស្ថាប័នអន្តរជាតិ ទើបកម្ពុជាអាចអនុវត្តបានតាមការតម្រូវនៃកិច្ចព្រមព្រៀង។ ទន្ទឹមនេះ ខ្ញុំសូមកត់សម្គាល់ថា ការដាក់ចេញនូវផែនទីចង្អុលផ្លូវស្តីពីកិច្ចសម្រួលពាណិជ្ជកម្មឆ្នាំ២០២២-២០២៥ គឺជាការរួមចំណែកបង្កើននូវប្រសិទ្ធភាពការងារ និងធានានូវកិច្ចសហប្រតិបត្តិការល្អគឺជាការរួមចំណែកបង្កើននូវប្រសិទ្ធភាពការងារនិងធានានូវកិច្ចសហប្រតិបត្តិការល្អ រវាងក្រសួង-ស្ថាប័នពាក់ព័ន្ធ វិស័យឯកជន និងដៃគូអភិវឌ្ឍន៍ ដើម្បីលើកកម្ពស់អនុលោមភាពកម្ពុជាក្នុងការអនុវត្តកិច្ចព្រមព្រៀង WTO-TFA ហើយការអនុវត្តកិច្ចព្រមព្រៀងនេះ ក៏ជាការរួមចំណែកសំខាន់មួយ ដើម្បីឆ្លើយតបកិច្ចខិតខំប្រឹងប្រែង របស់ក្រសួងសេដ្ឋកិច្ចនិងហិរញ្ញវត្ថុ ក្រោមការដឹកនាំរបស់ឯកឧត្តមអគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ក្នុងការចូលរួមអនុវត្តក្របខណ្ឌយុទ្ធសាស្ត្រ និងកម្មវិធីស្តារនិងជំរុញកំណើនសេដ្ឋកិច្ចកម្ពុជានានា ដែលរាជរដ្ឋាភិបាលបានប្រកាសដាក់ឱ្យអនុវត្តកន្លងមក សំដៅលើកកម្ពស់បរិយាកាសវិនិយោគ បង្កើនភាពងាយស្រួលក្នុងការធ្វើធុរកិច្ច និងជំរុញកំណើនពាណិជ្ជកម្មអន្តរជាតិ។ ជាចុងក្រោយ ខ្ញុំសូមថ្លែងអំណរគុណចំពោះក្រសួង-ស្ថាប័នជាសមាជិក គ.ជ.ស.ព. និងដៃគូអភិវឌ្ឍន៍នានា ជាពិសេស ARISE Plus Cambodia ដែលបានផ្តល់ជំនួយហិរញវត្ថុក្នុងការបោះពុម្ពលើកទី១នៃសៀវភៅ “ផែនទីចង្អុលផ្លូវស្តីពីកិច្ចសម្រួលពាណិជ្ជកម្មឆ្នាំ២០២២-២០២៥” នេះ។ លេខាធិការដ្ឋាន គ.ជ.ស.ព. ក៏សូមថ្លែងអំណរគុណចំពោះកិច្ចសហការរបស់បណ្តាក្រសួង-ស្ថាប័នមានសមត្ថកិច្ច វិស័យឯកជន និងដៃគូអភិវឌ្ឍន៍ ដែលបានរួមចំណែកចូលរួមជំរុញអនុលោមភាពរបស់កម្ពុជាក្នុងការអនុវត្តកិច្ចព្រមព្រៀង WTO-TFA។